شهر 2 - 2011 بدايتي الفعلية مع البرمجة كانت بحضور كورس جافا مدته 4 شهور كان حظي حلو جدًا إن المحاضر كان فاهم برمجة كويس فاستفدت منه كتير وبنى عندي الأساسيات صح (ألف شكر للبشمهندس إسلام يوسف ربنا يجزيه كل خير)
بعد ما خلصت الكورس كنت محتار أكمل في إيه؟ وكنت عايز أطبق ما تعلمته في الكورس عشان مانساش الجافا. وفي الفترة دي كان الأندرويد جديد وانتشاره بسيط بس الكلام عليه كان بدأ يزيد فقررت إني أتعلم برمجة الأندرويد لأن أولا: حبيت موضوع تطبيقات الهواتف الذكية. ثانيا: كنت شايف إن ليه مستقبل كبير.
شهر 9 - 2011 عدى عليه حوالي شهرين من غير ما أتعلم حاجة فعلية وكنت مستصعب الموضوع جدا ودورت كتير على شروحات بالعربي (لأن أيامها الانجلش كان ضايع معايه شويتين) بس للأسف ماكنش فيه غير كتاب واحد متوفر وكان مستواه تحت المتوسط، في الفترة دي كان فيه موقع جديد اسمه أندرويدهاز كان بيغطي مواضيع كتير عن أخبار الأندرويد بالعربي وأنا كنت أحد أعضاء الفريق التحريري للموقع فاقترحت على صاحب الموقع (الصديق العزيز عبد الرحمن أبو مالح) إنه يعمل سلسلة دروس عن برمجة الأندرويد فوافق على الفكرة بس ماكنش فيه حد ينفذها، فجه بعدها قلي إيه رأيك تعمل انت الموضوع دا، قلتله ماشي بس بعد 6 شهور تقريبا على ما اتعلم كويس، قالي كفاية شهر واحد وأقنعني إن أنا ممكن أذاكر وأنا بجهز للشروحات وأنزل درس واحد أسبوعي، وبالفعل عملت كده وكان أحسن قرار لأن خلى عندي التزام إن أذاكر كل أسبوع جزء معين عشان اقدر أجهز الشرح بتاعه.
وكانت المفاجأة بعد نزول أول درس إن الاقبال كبير جدا وخلال أسابيع كانت الدروس تخطت عدة آلاف من المشاهدات، وأتذكر ان أحد الدروس كان وصل لـ 30 ألف مشاهدة، سلسلة الشروحات كان اسمها "تعلم معنا برمجة الأندرويد" وصلت لـ 9 دروس كل درس صفحتين طوال مليان معلومات، بس للأسف الموقع تم اغلاقه بعد سنه .. ومازالت بعض الدروس متاحه على موقع اخر يمكن الاطلاع عليها من هنا.
شهر 5 - 2012 بسبب النجاح الكبير لسلسة الشروحات كانت بتظهر دايما في النتائج الأولى لجوجل لما تبحث عن برمجة الأندرويد وكان أحد الباحثين مدير شركة فضاء ميديا في القاهرة وكان بيدور على مبرمج أندرويد فلما شاف السلسلة بعتلي رسالة عشان اشتغل معاهم، وبالفعل اشتغلت معاهم على تطبيقين أول تطبيق اسمه "فقه العبادات المصور" والتاني كان اسمه "منبر" بس التطبيق الأول دا انا كنت عامل فيه حوالي 95% ورفعناه على المتجر بشكل مجاني وفي شهر واحد وصل لـ 5 آلاف تحميل وبعدين الشركة قررت انها تحذفه وترفعه مرة آخرى بفلوس، إنما التاني دا ماكملتوش للآخر .. واضطريت اسيب الشركة بسبب الدراسة وضغط الامتحانات.
خلال الفترة دي بداية من عام 2012 كنت بحاول أأسس شركة خاصة بي مع مجموعة من الأصدقاء الشركاء وحبيت إن أركز في الموضوع دا أكتر، الشركة دي اسمها عم أمين وكان عندنا موقع وبعدين أطلقنا نسخة تجريبية من تطبيق عم أمين على الأندرويد وشاركنا به في مسابقة سامسونج انطلق 2013 وتأهلنا للمراحل النهائية والحمدلله فزنا بجائزة عبارة عن هاتف أندرويد (ودي تجربتي الأولى في عالم ريادة الأعمال وهي لسه مكملتش بس حاليا متوقفه بشكل مؤقت).
شهر 9 - 2013 أما تجربتي التانية فكانت بتأسيس نواة لشركة جديده اسمها 3S Apps مع صديقين مميزين هما محمد حسين (مبرمج أندرويد في فودافون) وطيف الدليمي (مصمم وفنان كبير) بهدف إننا نقدم تطبيقات أندرويد عربية بجودة عالية لأننا كمستخدمين وجدنا إن معظم التطبيقات العربية على الأندرويد سيئة جدا ودا شئ ملاحظ بوضوح إلى الآن، وبالفعل أطلقنا عدة تطبيقات ولدينا مزيد من الأفكار مازالت في الفرن، والتطبيقات
كالتالي:
1- شبكات المحمول: وميزته تقسيم أرقام الهاتف
حسب شركات المحمول، يعني هتلاقي الأسماء لديك متقسمة في 3 قوائم مختلفة (فودافون –
موبينيل – اتصالات(
2- كارت المتصل: ودا عبارة عن كارت بيظهر
للمستخدم أثناء ورود اتصال، الكارت فيه بيانات الشخص المتصل المسجلة على الهاتف
بالإضافة إلى موعد اخر اتصال.
وهذان التطبيقان مازالا تحت التطوير لأن فيه مميزات عايزين نقدمها في
الإصدارات القادمة إن شاء الله.
3- تطبيق Notel: ودا تطبيق بيجمع الميزتين السابقتين مع
دعم العديد من الدول الأوروبية لأن كنا عايزين نشارك به في مسابقة أوروبية اسمها
"EESTEC
Competition for Android" ورغم إننا لم
نفز بجائزة ولكن ما أسعدني أننا حصلنا على الترتيب العاشر من 31 تطبيق نجحوا في
المشاركة.
4- الملتقى العربي: وهو تطبيق بسيط يحتوي على جدول فعاليات معسكر الشباب العربي للعمل التطوعي الثامن عشر برعاية وزارة الشباب والرياضة.
شهر 6 - 2014 مؤخرا حصلت على جهاز تابلت Galaxy Note 10.1 2014 Edition هدية من شركة Samsung دعما لتطبيقاتي وقيامي بنشرها على المتجر الخاص بالشركة.
شهر 8 - 2014 وحاليا شغال على تطبيق لشركة أسبانية فيه شغل كتير وشوية حركات حلوه، إن شاء الله لما يخلص ممكن أنزل تفاصيل عنه بعد استئذان العميل.
وبس كده .. الرحلة مازالت في بدايتها :)
حضرتك انا قرأت المقال كاملا ومع كل كلمه كنت ازداد اعجابا بالطموح والاجتهاد والرغبه القويه في النجاح . وحضرتك تعد نموذج رائع للشباب الطموح الناجح المجد ومما يثير الإعجاب حقا انك بدأت في سن صغيره واثناء دراستك الجامعيه ايضا ولم تنتظر حتي التخرج كما يفعل معظم الشباب ..تحياتي ودعائي لك بالتوفيق دائما .
ردحذفيا تري الرحلة وصلت لحد فين
ردحذف